Felicissima sera a tutte 'sti signure 'ncruvattate e a chesta cummitiva accussì allera d'uommene scicche e femmene pittate... Chesta è 'na festa 'e ballo... Tutte cu 'e fracchesciasse, 'sti signure... E i', ca sò sciso 'a copp''o sciaraballo, senza cercà 'o premesso, abballo i' pure.
Chi sò? Che ve ne 'mporta? Aggio araputo 'a porta e sò trasuto ccà... Musica, musicante! Fatevi mordo onore... Stasera miezo a st'uommene aligante abballa un contadino zappatore.
No, signore avucato, sentite a me, nun ve mettite scuorno, i' pè ve fà signore aggio zappato e stò zappanno ancora notte e ghiuorno. E sò duie anne, duie, ca nun scrive nu rigo a' casa mia; si 'ossignuria se mette scuorno 'e nuie, pur'io me metto scuorno 'e ossignuria.
Chi sò? Dillo a 'sta ggente ca i' songo nu parente ca nun 'o può caccià... Musica, musicante,ca è bella l'alleria... I' mo ve cerco scusa a tutte quante si abballo e chiagno dint''a casa mia!
Mamma toia se ne more... 'O ssaie ca mamma toia more e te chiamma? Meglio si te 'mparave zappatore, ca 'o zappatore nun s''a scorda 'a mamma! Te chiamma ancora "gioia" e, arravugliata dint''o scialle niro, dice:"Mo torna, core 'e mamma soia, se vene a piglia l'ultimo suspiro".
Chi sò? Vuie me guardate? So''o pate...I' songo 'o pate, e nun me po' caccià... So' nu faticatore, e magno pane e pane... Si zappo a terra, chesto te fa onore... Addenocchiate. E vàseme 'sti mmane.
