SILENZIO CANTATORE
di: Lama - Bovio
I
Zitta,
stanotte nun dicere niente,
cademe 'mbraccia, ma senza parlà...
Dòrmeno 'e ccose nu suonno lucente...
nu suonno 'e 'na notte d'està:
Ritornello:
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'stu mare pe' me!...
II
Dimme:
stanotte si' tutta d''a mia?
Ll'uocchie tuoie belle me diceno 'e sì...
No, cu 'sta luna, nisciuna buscia
'sta vocca busciarda pò dì!...
Ritornello:
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'stu cielo pe' me!...
III
Cielo,
rispunne! Rispunneme, mare...!
Stelle, pecchè nun vulite parlà?...
Napule, e dimme: Sò ddoce o sò amare
'sti llacreme c'aggia jettà?...
Ritornello:
Marì,
dint''o silenzio,
silenzio cantatore,
nun te dico parole d'ammore,
ma t''e ddice 'o silenzio pe' me!...
Zitta,
Marì!...
