'O MARENARIELLO
di: Cambardella - Ottaviano
I
Oie nè, fa prieste, viene!
nun me fa spantecà,
ca pure 'a rezza vene
ch''a mmare sto a menà.
Meh, stienne sti braccelle
aiutame a tirà,
ca stu marenarielle
te vo semp'abbraccià.
Vicin''o mare
facimmo ammore,
a core a core
pe nce spassà.
So marenare
e tiro 'a rezza;
ma p'allerezza
stong''a murì.
II
Vide che sbatte l'onne
comme stu core ccà;
de lacreme te nfonne
ca 'o faje annummurà.
Viene, 'nterr''a st'arena
nci' avimma recrià;
che scenne la Serena
i' po stong''a cantà.
Vicin''o mare
facimmo ammore,
a core a core
pe nce spassà.
So marenare
e tiro 'a rezza;
ma p'allerezza
stong''a murì.
III
Oie nè, i' tir''a rezza
e tu statt''a guardà
li pisce p''a priezza
comme stann''a zumpà.
E vide, pur' 'e stelle
tu faie annammurà,
ca stu marenarielle
tu faie suspirà.
Vicin''o mare
facimmo ammore,
a core a core
pe nce spassà.
So marenare
e tiro 'a rezza;
ma p'allerezza
stong''a murì.
